Grunnuppskrift af hráfæðisúkkulaði
Þetta súkkulaði er algjört æði. Það besta við það er að þú ættir í raun að fá þér mola reglulega þar sem það er svo gott fyrir þig ;o)
Grunnur:
· 1 bolli gæðakakó. (Ég mæli eindregið með því að varan sé “Fair Trade”).
· 1 bolli kókosolía. (Setjið kókosolíukrukkuna í heitt vatn svo olían verði fljótandi).
· ½ bolli agave sýróp.
· ¼ tsk. grænt duft. (Því má sleppa)*
Það er líka mjög gott að setja 1 msk. lífrænt hlynsýróp og ½ tsk. lífrænt vanilluduft út í grunninn – en ekki nauðsynlegt.
*Grænt duft, t.d. Spirulina, hægir á sykrinum út í blóðið og inniheldur líka mikið af andoxunarefnum. Merkilegt nokk! Það gerir súkkulaðið einnig mýkra og áferðafallegra.
Setjið öll innihaldsefnin í skál og hrærið þeim saman þar til blandan verður kekklaus.
Skemmtilegast er að láta hugmyndarflugið ráða og bæta út í hnetum, rúsínum, gojiberjum, þurrkuðum ávöxtum, piparmyntu eða eitthvað annað sem þér finnst gott.
Aðferð:
Blandan er sett í konfektform en einnig er einfalt að hella henni beint á bökunarpappír. Eftir skamma stund í frysti, er auðvelt að skera súkkulaðið í passlega stóra bita. Það er virkilega gómsætt að dýfa eplasneiðum eða öðrum ávöxtum í hráfæðisúkkulaðið. Súkkulaðið hentar einnig einstaklega vel sem íssósa.
ATH. Hráfæðisúkkulaði verður aldrei grjóthart og bráðnar auðveldlega við stofuhita. Því er best að geyma það alltaf í kæli eða frysti.
